Navoiy kon-metallurgiya kombinati ishchi-xodimlari o‘rtasida ommaviy sport bilan shug‘ullanishni va sog‘lom turmush tarzini targ‘ib etish maqsadida, Navoiy, Zarafshon, Uchquduq shaharlari va Zarkent qo‘rgo‘nidagi sport majmualarda haftaning har payshanba va shanba kunlari 10 dan ortiq ommaviy sport turi bo‘yicha mashg‘ulotlar olib borilmoqda.

Jumladan, Navoiy shahridagi “So‘g‘diyona” jismoniy tarbiya va sport majmuasida tashkil etilgan “Sog‘lomlashtirish kuni”da “NKMK” AJ, “Navoiyuran” DK va “NKMK jamg‘armasi” DMda ishlaydigan xotin-qizlar va ularning farzandlari ishtirok etishdi.

Majmuaning gimnastika zalida murabbiy M.Gumirova tomonidan aerobika va sheyping mashg‘ulotlari o‘tkazildi. Mashg‘ulotlarda 50 nafarga yaqin xotin-qizlar qatnashdi.

Shuningdek, Navoiy shahridagi Sport saroyida “NKMK” AJ “Qizilqum” kon boshqarmasi ishchi-xodimlari o‘rtasida sportning shaxmat va stol tennisi turlari bo‘yicha ochiq turnir o‘tkazildi.

3-kasaba uyushmasi qo‘mitasi hamda yoshlar yetakchilari Kengashi tomonidan tashkil etilgan turnirda kon boshqarmasi bo‘linmalarida ishlaydigan ishchi-xodimlar ishtirok etishdi.

Yakuniy natijaga ko‘ra, g‘olib va sovrindorlar tashkilotchilar tomonidan sovg‘alar bilan taqdirlandi.

“NKMK” AJ Matbuot xizmati.