“Navoiy kon-metallurgiya kombinati” AJ va Favqulodda vaziyatlar vazirligi Seysmoprognostik monitoring Respublika markazi mutaxassislari ishtirokida 25-fevral kuni kombinat O‘quv markazida sohaga doir qonunchilik targ‘iboti bo‘yicha davra suhbati bo‘lib o‘tdi.

Tadbirda Seysmoprognostik monitoring Respublika markazi boshlig‘ining birinchi o‘rinbosari Jaloliddin Karimov tomonidan “Seysmik xavf: kelib chiqish sabablari va ko‘rilayotgan choralar” mavzusida ko‘rgazmali taqdimot o‘tkazildi. Uning maʼlum qilishicha:

“Favqulodda vaziyat davrida aholi va hududlarni seysmik xavfdan himoya qilish, tabiiy va texnogen xavfli hududlarda seysmik xavfsizlik bo‘yicha monitoring ishlarini olib borish, zilzilalar to‘g‘risida aholini tezkor xabardor qilish borasida respublikamizda keng qamrovli ishlar olib borilmoqda. Ushbu dolzarb vazifa masʼulligi bizning markaz jamoasi zimmasiga yuklangan. Bu borada muhim strategik inshootlariga ega NKMK bilan ham mustahkam aloqalar yo‘lga qo‘yilgan va hamkorlik ijobiy natijasini bermoqda. Jumladan, “Muruntov” koni va yaqin atrofdagi hududlarga o‘rnatilgan 5 ta zilzilalarni qayd etuvchi stansiyalar orqali biz doimiy seysmik holatlarni monitoring qilib boramiz.”

Maʼlumot o‘rnida aytish mumkinki, bugungi kunda respublikamiz hududida 100 ga yaqin kuchli zilzilalarni qayd etuvchi stansiyalar faoliyat olib bormoqda. 2026-yilgacha ular sonini 200 taga yetkazish ko‘zda tutilgan. Shu bilan birga, xalqaro seysmik kuzatuvlar global tizimi bilan integratsiyalashuv asosida yurtimizda kuchli zilzilalar haqida erta ogohlantirish milliy tizimi samaradorligini oshirish muhimligi doirasida ham ishlar olib borilmoqda. Bu, shak-shubhasiz, ogohlikni oshirish bo‘yicha qo‘shimcha qulayliklar yaratadi.

Shuningdek, davra suhbatida mazkur markazning kameral tahlil partiyasi boshlig‘i Qodirjon Qo‘chqorov ham hamkorlikni yanada kengaytirish bo‘yicha o‘z takliflarini bildirdi.

“NKMK” AJ Innovatsiya markazi, Marksheyderlik xizmati va Favqulodda vaziyatlar bo‘limi tomonidan tashkil etilgan tadbirda ishtirokchilarga batafsil maʼlumot berilib, tadbir so‘ngida kelgusida hamkorlikda amalga oshiriladigan ishlar yuzasidan o‘zaro kengashib olindi.

“NKMK” AJ Matbuot xizmati.