“Sharqiy” koni – Shimoliy kon boshqarmasi tarkibidagi yirik konlardan biridir. Bugungi kunda mazkur konda konchilik ishlari “Qoqpatas va Dovg‘iztov oltin konlarida maʼdan qazib olish 3-navbati” investitsion loyihasi doirasida amalga oshirilmoqda.

Joriy yilning fevral oyidan boshlab “Turbay” karyeri “Sharqiy” koni tarkibiga o‘tkazilganligi konda oltin tarkibli maʼdan qazib olish hajmi va ishlab chiqarish surʼatini oshirishga xizmat qilmoqda.

- Hozirgi vaqtda konning 14 ta sulfidli maʼdan karyerida konchilik ishlari bajarilyapti. 2024-yilda 38 mln. kubometrdan ortiq tog‘ jinslari qazib olingan bo‘lsa, 2025-yilda 57 mln. kubometrdan ortiq tog‘ jinslarini qazib olish rejalashtirilgan, - deydi “Sharqiy” koni boshlig‘i Bobur Bobojonov.

Mazkur kon tarkibi kengayganligi bilan birga, burg‘ilash uskunalari, ekskavatorlar, avtoag‘dargichlar kabi zamonaviy og‘ir konchilik texnikalari soni ham qariyb 50 foizga oshdi. Bu kabi texnikalar soni oshishi tufayli joriy yilda 3-gidrometallurgiya zavodiga 5.3 mln. tonna maʼdan hamda 5-gidrometallurgiya zavodiga 4 mln. tonna maʼdanni qayta ishlash uchun tashish ko‘zda tutilgan.

“Sharqiy” konida amalga oshirilayotgan ishlar Navoiy kon-metallurgiya kombinatida qimmatbaho metallarni ishlab chiqarish hajmini oshirishda muhim ahamiyat kasb etadi.

“NKMK” AJ Matbuot xizmati