Geologik-qidiruv ishlari bo‘yicha mutaxassislarning maʼlumotlariga ko‘ra, Navoiy kon-metallurgiya kombinatining Samarqand viloyati Qo‘shrabot tumanida joylashgan “Zarmitan” yer osti koni maʼdan zaxirasi 2050-yilgacha yetishi hisob-kitob qilingan.

Keyingi yillarda “Zarmitan” konida modernizatsiya, qayta jihozlash va yangi texnikalar bilan taʼminlash ishlari olib borildi. Jumladan, amalga oshirilgan loyihalar asosida konning yer osti konchilik ishlarida 2024-yilda 1,17 mln. tonna oltin tarkibli maʼdan qazib olingan. Bu, 2002-yilga nisbatan qariyb 13 barobar ko‘pdir. Raqamlarni solishtiradigan bo‘lsak, 2002-yilda 365 kun davomida qazib olingan maʼdan miqdori 2024-yilda 28 kunda qazib olingan.

- Ishlab chiqarishni modernizatsiyalash, zamonaviy texnologiyalar, innovatsion g‘oyalar asosida konda maʼdan qazib olish quvvatini bosqichma-bosqich oshirib borayapmiz. Shu yilning o‘tgan uch oyida 370,5 ming tonna maʼdan qazib olindi. Yil yakuniga qadar zimmamizga yuklatilgan vazifalar to‘liq bajariladi. Buning uchun barcha imkoniyatlar yetarli, - deydi “Zarmitan” koni boshlig‘i Ilhom O‘sarov.

Hozirgi kunda 1,6 ming nafardan ortiq ishchi-xodim faoliyat olib borayotgan “Zarmitan” koni kombinatning ishlab chiqarish surʼati yuqori konlaridan biri hisoblanadi. Shundan, 370 nafari yoshlar, 75 nafari xotin-qizlar. Ularning fidkorona mehnatlari tufayli jamoa katta yutuqlarga erishib kelmoqda.

“NKMK” AJ Matbuot xizmati